اوستاد محمد حسین كیانی اولمه گی ایچون

ائل قوپاردان شاد نغمه لر وای اولدو  

                                     یاز دونیادان بیزه خزان پای اولدو

اوستاد محمد حسین كیانی، قاشقایی نینگ بویوگ ایرچی سی و موسیقی بیله نی بو دونیادان گوز كسدی و جنت قوشو كیمین بهشت گولزارینی یاد ائدیب گئتدی.

 

اوستاد كیانی بیر قرن قاشقایی  شادلیقیندا و غمینده ائل قراقیندا واریدی. اوستاد كیانی موسیقی هنرمندلرینینگ نئچه نسلینی بیبیره وصل ائدمیشدی. محمدحسین كیانی، اوستاد داوود نكیسا و اوستاد سلیمان و اوستاد هادی نكیسا زامانیندا و بو اوستادلار مكتبینده بئسلنمیش و سورادان اوستاد حبیب خان گرگین پور و فرود خان و فرهاد خان قراقیندا دایاق ایمیش. اوستاد كیانی گچن ایكی دهه ایچینده جوان لار و موسیقی اینن چالیشان لارا بیر بویوگ بلدچی و یول بیلن ایدی و همیشه جوانلار قراقیندا اونلارا انگیزه وئرمیش دیر. دوغرو سوز بو دور كی اوستاد كیانی قاشقایی نینگ و حتی هامی تورك لر آراسیندا كی روایت لری یاخچی سویلردی و اونو گوزه ل سسی اینن ایرلاردی. قاشقایی لار بیلرلر كی اوستاد كیانی "اصلی و كرم"، "غریب و صنم" و "محمود و نگار" داستان لارینی نه گوزه ل ائحساسلی اوخوردی كی هلز قولاقلاردا گوزه ل سسی دولانیر و اوره گ لرده هلز یئری وار و یادی تا زامان وار دیری قالار.... 

بو بویوگ اوستادینگ اولمه گی محترم خانواده سینه، قاشقایی نینگ هنرمندلرینه و موسیقی بیلن لرینه تسلیت اولسون. تاری اونو رحمت ائله سین.

یادی گوینلرده دیرری قالار.

ادامه مطلب

نویسنده: وحید رستمی

آتالار سوزو

استاد مردانینینگ ده یرلی "آتالار سوزو" كیتابی توركییه كشورینده ده چاپ اولونیر

ضرب المثل لر قووملار و دیللرینگ اصلی ترین هویتی دیر. من بونا اعتقادیم وار كی ضرب المثل لر عومورو ائله هر دیلینگ قدمتی و عوموروچاز برابر دیر. ضرب المثل لر (آتالار سوزو) هر دیلده آتالار و آنالار سوزو دیر كی نه بیر شخص و نه بیر زاماندا دئییلمیش بلكه زامان گچمیش، تجربه لر ییغیلمیش، بیر پارا مسائیل لری و واقعیت لری درك ائدمیش لر، بیر اصل كیمین قبول اولونموش و نسللر اونو نقل ائدیب و زنجیر وار داهی نسللره ائتیدرمیشلر. پس آتالار سوزو عمرو اوزاق دیر و ائله دیل تاریخی نینگ اوزاقینا.

"آتی آت یانینا باغلاسانگ هم رنگ اولماسا هم خوی اولار"

بو مثل تعبیری بو دیر كی هم نشین و یولداش بیربیردن تاثیر دوتارلار و ائله چوخ تاثیر كی اگر هم رنگ ده اولدولار تعجبی یوخودیر "هم رنگ اولماسا هم خوی اولار" چون كی ایكی یولداش بو قدر باشاریر بیربیره موثر اولا.

آتالار سوزو باشاریر هر دیلینگ دوامینا و قالماقینا و وارلیقینا بیر اصلی دلیل اولا.

"آتالار سوزو ائلیمیز گؤزؤ"

پس گلینگ تا دیلیمیز وارلیقی و دوامی ایچون آتالار سوزونه ارزش بیلگ.

 

اون اییل موندان ایلری ائلیمیزینگ بویوگ اوستادی آقای اسدالله مردانی، نئچه ایلینگ زحمتینی بیر كیتاب قالیبینده چاپا ائتیردی كی اونونگ آدی "آتالار سوزو" ایدی. بو كیتابینگ چاپ اولماگی، قاشقایی ادبیاتی ایچون بیر بویوگ قوللوق اولوندو. استاد مردانییی هامی كیمسه لری كی ادبیات و هونرینن چالیشماگ وارلاری تانیرلار و بو بویوگ استاد بو كیتاب دان آیری دا نئچه ارزشلی و بویوگ ادبی و تحقیقی كیتاب، قاشقایی ادبیاتی و دیلی ایچون یازمیش و چاپا ائتیردمیش كی حقدن 30 ایل ارزشلی عمروندان تحقیق و مطالعه و یازماگ ایچون وقف ائدمیش. آساناك لار- زبان تركی قشقایی و شیوه نگارش آن – مكالمه زبان تركی قشقایی و هامی دان ارزشلی تر و ده یرلی تر قاشقایی سوزلوگو (فرهنگ زبان تركی قشقایی) و داهی مقاله لر و تحقیق لری كی بو زمینه ده ائدمیش لر استاد مردانی نینگ آثاری دیر. اولا كی قدردان اولاگ و قدرشناس.

استاد مردانی نینگ آثاری نه فقط قاشقایی توركلری ایچینده استفاده اولونیر بلكه ایران توركلری ده بو كیتابلاری استفاده ائدیرلر و اونلار ایچون ده بیر مرجع دیر و حتی دونیادا بو تحقیق لرینگ انعكاس واری و تاثیر. تازالیگدا بیر خبر بیزه چاتدی كی استاد مردانینینگ "آتالار سوزو" كیتابینی توركییده بیر تورك ادبیاتینینگ بیلینجی سی (دانشجو) توركیه نینگ لاتین الفباسینه دوندریر تا باشارا بو دیله و بو الفبایا چاپ ائده و اونو توركیه خلقی ده مطالعه ائده بیله. بو اتفاق بیر بویوگ افتخار دیر اول استاد مردانی ایچون و سونگدان دا  قاشقایی خلقینه. تورك دونیاسیندا داهی مرزلر آرادان گئدیر و هونر و ادبیاتی مرز تانیماز. تاری دان هامی تورك ادبیاتی ایچون و خصوصا استاد اسدالله مردانی ایچون كی بیزه چوخ افتخارلارا نصیب ائدمیش ساغلیق و خوشحاللیگ آرزوسو واریم...

بو خبری بوردا دا اوخویونگ http://www.qashqaiturk.blogsky.com/1387/11/11/post-57//    

به نقل از هنر قشقائی

ادامه مطلب

نویسنده: وحید رستمی